ОАВ: АҚШ Россиянинг Украинага оид “даҳшатли” режаси ҳақида БМТни огоҳлантирди
Ғарб ахборот агентликларига кўра, Қўшма Штатлар Бирлашган Миллатлар Ташкилотига Россия томонидан украиналикларни ўлдириш ёки мамлакатга бостириб кирилган тақдирда уларни лагерларга жўнатиш режалари ҳақида "ишончли маълумотлар" борлигини маълум қилган.
АҚШнинг Женевадаги элчиси Нелл Крокер 20 февраль куни БМТнинг инсон ҳуқуқлари бўйича Бош комиссарига йўллаган мактубида АҚШ разведкаси тўплаган “хавотирли маълумотлар” тафсилотларини айтиб ўтган.
Мактуб АFP, Reuters ва Dpa ахборот агентликлари хабар қилди.
“Биз Россиянинг Украинанинг аллақачон босиб олган қисмларида давом этаётган инсон ҳуқуқлари поймол этилиши ҳолатларидан чуқур хавотирдамиз ва бу хавотирлар янги ҳарбий босқиндан сўнг янада кўпайишига ишониш учун барча асосларимиз бор”, — дейилади мактубда.
Крокер мактубда Кремль Россиянинг Украинадаги ҳаракатларига қарши чиққанларни ўлдириш, ўғирлаш, ҳибсга олиш ва қийноққа солишни режалаштираётганини даъво қилган.
Шунингдек, мактубга кўра, Украинада сургунда бўлган рус ва беларуслик қочқинлар, журналистлар ва бошқа фаоллар нишонга олиниши мумкин.
“Россия ўлдириши ёки ҳарбий ишғолдан кейин лагерларга юборилиши керак бўлган украиналикларнинг рўйхатини тузаётганини кўрсатадиган ишончли маълумотларга эгамиз”, дея қайд этилган мактубда.
Крокер, шунингдек, Қўшма Штатлар рус армияси норозилик намойишларини тарқатиб юбориш ёки "аҳолининг тинч қаршилик ҳаракатларини" бостириш учун ҳалокатли усуллардан фойдаланиши мумкинлиги ҳақида маълумотга эга эканлигини қўшимча қилган.
АҚШ юборган мактубида маълумот манбалари ошкор этилмаган.
21 февраль куни бунга жавобан Кремль бу хабарларни “мутлақо ёлғон” деб атади. АҚШ ва бошқа Ғарб расмийлари Россияни Украинага бостириб киришни режалаштираётганликда айбламоқда.
Чегара яқинида 150 мингга яқин аскар тўпланганига қарамай, Москва бундай режаларни рад этиб келади.
Михаил Саакашвили қамоқхонада яна очлик эълон қилди
Грузия собиқ президенти Михаил Саакашвили 21 февраль куни ўзига нисбатан бошланган навбатдаги суд жараёнида яна очлик эълон қилганини билдирди.
“Бугундан бошлаб мен муддатсиз очлик эълон қиламан. Бу режим менга ва халқимизга қилаётган муносабатга жавобдир. Мен Халқ ҳимоячиси ва “Эмпатия” марказлари томонидан ташкил этилган врачлар консилиуми тавсия қилган тиббий кўмак кўрсатилишини талаб қиламан”, -деб иқтибос келтирди Саакашвил сўзларидан "Эхо Кавказа" нашри.
Саакашвили ўз соғлиғи учун қайғурмаслигини айтди ва судда нидерландиялик врачнинг мактубини ўқиб эшиттирди. Мактубда Саакашвилининг қайта очлик эълон қилиши ўлим ҳолати билан якунланиши мумкинлиги қайд этилади.
Саакашвили 2021 йилнинг 1 октябрида Украинадан Грузияга қайтган пайтда қамоққа олинган эди. У ўша куниёқ муддатсиз очлик эълон қилган. 50 кунлик очликдан сўнг аҳволи ёмонлашган Саакашвили 20 ноябрда Гори ҳарбий госпиталига даволаниш учун ётқизилган. Унинг аҳволи бир оз яхшиланиши билан яна қамоқхонага кўчирилган.
CIT: Украина чегарасида Россия ҳарбий техникаси ҳаракати кузатилди
Conflict Intelligence Team (CIT) суриштирув гуруҳи сўнгги кунларда очиқ маълумотларда пайдо бўлган фотосурат ва видеоларга асосланган ҳолда, Россия ҳарбий техникаси Украина ҳудудида ҳаракатлана бошлаганини маълум қилди.
Гуруҳнинг билдиришича, ҳарбийларни Россиянинг бошқа ҳудудларидан Украина чегараларига жамлаш жараёни ниҳоясига етган бўлиши эҳтимол. Чунки авваллари ҳудудга техника темир йўл ёки танк ташувчи юк машиналарида олиб келинган бўлса, эндиликда ҳарбий техника ўзи ҳаракат қила бошлади.
“Техника эҳтимолий ҳужум уюштириладиган асосий позицияларга жойлаштирилаётган бўлиши мумкин”,-дейилади хабарда.
CIT қўлга киритилган маълумотларда чегара яқинидаги рус ҳарбийлари оғир шароитларда яшаётгани, марказлаштирилган озиқ-овқат таъминоти йўқлиги қайд этилганини таъкидлаган.
“Қўшинни узоқ пайт бундай аҳволда ушлаб туриш мумкин эмас. Шунинг учун яқин кунларда ё ҳужум қилинади ёки ҳарбийлар қисман олиб чиқиб кетилади”,-деб ёзади гуруҳ тадқиқотчилари.
АҚШ ва Ғарб давлатлари разведкасининг билдиришича, Россия Украина билан чегарага 150 минг аскар ва ҳарбий техникани жамлаган.
Россия Украинадан отилган бомба чегара хизмати объектини вайрон этганини иддао қилди
Россия Федерал хавфсизлик хизмати - ФХХ 21 февраль куни эрталаб Украина ҳудудидан отилган бомба Ростов вилоятидаги чегара хизмати объектини вайрон этгани тўғрисда хабар берди.
ФХХнинг билдиришича, объект Украина чегарасидан 150 метр узоқликда жойлашган. Бомба тушган пайтда бу ерда ҳеч ким бўлмаган. Аммо ФХХ вайрон бўлган объектнинг аниқ манзили ҳақида маълумот бермади. ФХХнинг бу маълумотини ҳозирча бирорта мустақил манба тасдиқламади. Украина томони эса Россия ҳудудига бомба отилгани тўғрисдаги хабарни инкор этди.
Аввал ҳам Кремль Украинадин отилган бир неча бомба Россия ҳудудига келиб тушгани тўғрисда хабар берган. Украина президенти Владимир Зеленский бу хабарларни ёлғон ва провокация сифатида баҳолаган.
Россиянинг Кубанида бюджет ходимларидан Донбассдан эвакуация қилинганлар учун пул йиғилмоқда
Краснодар ўлкасидаги Ей туман тиббиёт муассасалари ходимлари “ихтиёрий-мажбурий” тарзда бир кунлик иш ҳақларини Украинанинг Луганск ва Донецк вилоятларидан эвакуация қилинганлар фойдасига ўтказиб бераётганлари тўғрисида маълум қилди.
Кавказ.Реалии сайтига бу маълумотни “Яблоко” партиясининг маҳаллий бўлими раиси Александр Коровайний тасдиқлади.
Унга кўра, 15 минг рубль ойлик олаётган тиббиёт ходимлари “ўзи шундоқ ҳам ҳеч нарсага етмаётган иш ҳақлари”ни эвакуация қилинганлар билан бўлишаётганидан норози.
Хабарда айтилишича, тиббиёт ходимларига россияпарастлар назоратидаги Украина ҳудудларидан эвакуация қилинганларга “моддий ёрдам” кўрсатиш тўғрисда “юқори”дан буйруқ берилган.
Бундан ташқари Ей туманидаги барча мактаб ўқитувчиларига ҳам бир кунлик иш ҳақларини эвакуация қилинганлар фойдасига ўтказиш тўғрисида кўрсатма берилган.
Россияпарастлар назоратидаги Донецк ва Луганск расмийлари аҳолини Россия минтақаларига эвакуация қилиш тўғрисида 18 февралда қарор қабул қилган эди.
Россия Фавқулодда вазиятлар вазирлигининг билдиришича, шу кунгача Донецк ва Луганскдан Россияга 61 минг киши эвакуация қилинган. Россия президенти Владимир Путин уларнинг ҳар бирига 10 минг рублдан пул бериш тўғрисида буйруқ чиқарган.
Reuters: АҚШ Россия банклари транзакцияларига санкциялар жорий этиши мумкин
АҚШ президенти Жо Байден маъмурияти Америка ва Россия банклари ўртасидаги молиявий муносабатларни тақиқлашга оид ҳужжат лойиҳасини тайёрлади. Reuters агентлигининг билдиришича, мазкур ҳужжат Россия Украина ҳудудига бостириб кирган тақдирда амалга киритилади.
Хабарда таъкидланишича, ҳужжатда биринчи навбатда Россиянинг ВТБ, Сбербанк, ВЭБ.РФ ва Газпромбанк билан муносабатлар узилиши қайд этилган. Аммо бу якуний рўйхат эмас, қора рўйхатга яна банклар қўшилиши мумкин.
Бундан ташқари Оқ Уй жисмоний ва юридик шахсларга ҳам санкция қўллаш масаласини ўрганмоқда. Уларнинг АҚШдаги акциялари музлатилади ва ҳар қандай пул ўтказмалари тақиқланади. АҚШ ҳукумати бу маълумотни изоҳлашдан бош тортди.
Байден Путин билан саммит ўтказишга “умуман олганда” розилик берди
АҚШ президенти Жо Байден ва Россия президенти Владимир Путин Украина теварагидаги вазиятни муҳокама қилиш учун саммит ўтказишга “умуман олганда” розилик билдиришди – бу ҳақда 20 февраль куни Елисей саройи вакиллари маълум қилишган.
Эммануэл Макроннинг Владимир Путин ҳамда Жо Байден билан телефон орқали сўзлашувларидан сўнг Франция президенти девонхонаси томонидан эълон қилинган расмий баёнотда АҚШ ва Россия раҳбарлари учрашув ўтказишга тайёрлиги билдирилган. Бироқ учрашув “Россия Украинага бостириб кирмаган тақдирдагина” бўлиб ўтади.
Оқ уй матбуот котиби Жен Псаки дастлабки келишув мавжудлигини тасдиқлаган. “Биз дипломатияга ҳамиша тайёрмиз. Шунингдек, Россия урушни танлагудек бўлса, шошилинч ва қаттиққўллик билан жавоб қайтаришга ҳам шаймиз. Айни пайтда Россия Украинага қарши кенг кўламли ҳужумга ўтишга ҳозирлик кўрмоқда, бу ҳужум тез фурсат ичида бошланиши мумкин”, деган Псаки.
Москва мазкур хабар юзасидан изоҳ берганича йўқ.
Муҳтамал учрашув кун тартиби АҚШ давлат котиби Энтони Блинкен ҳамда Россия ташқи ишлар вазири Сергей Лавров томонидан уларнинг 24 февралга режалаштирилган учрашуви чоғида тайёрланади, дейилган Франция президенти девонхонаси баёнотида.
NBC телеканалининг Байден маъмуриятидаги ўз манбасига сўзларига таянган ҳолда хабар қилишича, АҚШ разведка хизматлари тасарруфида Россия ҳарбий қўмондонлигига Украинага бостириб киришга шай туришга буйруқ берилгани ҳақида маълумотлар мавжуд. Айнан шу маълумотлар 18 февраль куни Байденнинг Владимир Путин Украинага қарши тажовуз бошлашга тайёрлиги ҳақида баёнот беришига асос бўлган.
Қозоғистонда собиқ мудофаа вазири Марат Бектанов ҳибсга олинди
Қозоғистонда собиқ мудофаа вазири Марат Бектанов қўлга олинди. Бу ҳақда мамлакат Бош прокуратураси маълумот тарқатди.
Бектановга январь ойида амалдаги ҳокимиятга қарши юзага келган норозилик ҳамда бунинг ортидан рўй берган тартибсизликлар чоғида ҳаракатсизлик айби қўйилган. Собиқ вазир пойтахт Нур-Султондаги тергов ҳибсхонасида сақланмоқда.
Мурат Бектанов Қозоғистон Мудофаа вазирлигига 2021 йил августидан бери раҳбарлик қилиб келаётганди. У жорий йилнинг 19 январь куни норозилик акциялари авжига чиққан пайтда президент Тоқаев фармони билан лавозимидан озод этилган.
Қозоғистонда январь ойи бошида суюлтирилган газ нархи кескин ошиб кетиши ортидан норозилик чиқишлари бошланиб кетган. Кейинроқ норозилар сиёсий талабларни илгари сура бошлаганлар. Ўшанда собиқ президент Нурсултон Назарбоевнинг ҳокимиятдан ва сиёсатдан кетказиш талабини билдирувчи “Шал, кет!” (“Чол, кет!”) хитоби норозилик акцияларининг энг машҳур шиорига айланган.
Намойишлар манзарасида қатор шаҳарлар, энг аввало Олмаотада тартибсизликлар бошланиб, қурол қўлланилди. Қозоғистон расмийлари тартибсизликларни норозилар эмас, чет элда етиштирилган террорчилар уюштирганини иддао қилишди. Тоқаевнинг илтимоси билан мамлакатга Россия ва унинг иттифоқчилари ҳарбийлари киритилди. Бир неча кун ўтиб, тартибсизликлар босилгач, қўшинлар мамлакатдан олиб чиқиб кетила бошланди.
Расмий маълумотларга кўра, январь воқеалари чоғида камида 227 киши ҳалок бўлган. Ҳуқуқбонлар чақириғига қарамай, расмийлар қурбонлар номларини очиқлашдан бош тортишди.
Январь воқеалари пайтида ва ундан сўнг минглаб одам қўлга олинган, улардан бир қисми террорчилик, оммавий тартибсизликлар, қурол-аслаҳа ўғирлаганлик ва бошқа жиноятларда айбланиб, ҳибсга олинган. Қўлга олинганларнинг кўпи ҳибсхонада уларга нисбатан қийноқ қўлланилганини иддао қилган.
Адвокат Йилмаз: Ўрхан Инанди қийноқлар остида кўрсатма берган
Қирғизистондаги “Сапат” халқаро таълим муассасаси президенти Ўрхан Инанди Туркияда кучли босим ва қийноқлар остида терговчиларга кўрсатма берган. Бу ҳақда 20 февраль куни Озодликнинг қирғиз хизматига унинг адвокати Халил Иброҳим Йилмаз маълум қилди.
Адвокатга кўра, иш бўйича 3 февраль куни Туркия пойтахти Анқарада бўлиб ўтган навбатдаги суд мажлисида Ўрхан Инанди бирор террорчилик ташкилоти билан ҳеч қанақа алоқаси йўқлиги ва ҳибсда бўлган 37 кун давомида терговчилар уни қийноққа солган ҳолда кўрсатма олишганини яна бир карра айтган.
Ўрхан Инанди иши Анқарада Олий суд томонидан кўрилмоқда. У қуролли террорчилик ташкилотини бошқарганликда айбланяпти. Прокуратура Инандини 15 йилдан 22,5 йилгача озодликдан маҳрум этишни сўраган.
Ўрхан Инанди Туркияда туғилган бўлиб, 1995 йилда Қирғизистонга келган, 2012 йили эса бу мамлакатдан фуқаролик олган. У “Сапат” (аввалги номи Sebat) халқаро таълим муассасасига раҳбарлик қилган. Инанди ўтган йилнинг 1 июнига ўтар кечаси ғойиб бўлган эди, 5 июль куни эса Туркия президенти Ражаб Тоййиб Эрдўғон турк махсус хизматлари Ўрхан Инандини мамлакатга келтиришганини маълум қилиб, уни “ФЕТО ташкилотининг Марказий Осиёдаги бошқарувчиси” деб атаган.
БМТ Қийноқларга қарши қўмитаси Ўрхан Инандининг ўғирланишида Қирғизистоннинг айби борлигини билдирган. Инанди ғойиб бўлганидан сўнг Қирғизистонда мамлакат Жиноят кодексининг 170-моддаси (“Одам ўғирлаш”) бўйича иш очилган. У Интерпол орқали халқаро қидирувга ҳам берилган. Кейинроқ қирғиз милицияси Инандига Қирғизистон паспорти берилишининг қонунийлигини текширишини билдирган, ҳарбий прокуратура эса унинг чет элга олиб чиқиб кетилиши факти бўйича тергов бошлаган.
Адвокат Халил Иброҳим Йилмаз аввалроқ Инанди ўзини кимлар ўғирлаганини билмаслигини маълум қилганди. Инанди қирғиз миллатига мансуб уч киши уни ушлаб олиб, кўзларини боғлаган ҳолда бир неча соат машинада олиб юргани ва учоққа ўтқизганини, учоқ эса уни Туркияга етказганини айтган, холос.
Расмий Киев ўз назоратидаги ҳудудлар бўлгинчилар томонидан 53 марта ўққа тутилганини маълум қилди
Украина расмийлари 20 февраль куни мамлакат шарқидаги бўлгинчилар томонидан яна ўнлаб маротаба ўт очилганини қайд этишди.
Киев вакилларига кўра, Украина назоратидаги ҳудудлар камида 53 марта ўққа тутилган ва барча ҳолатда Минск келишувлари билан тақиқланган қуроллардан фойдаланилган. Отишма натижасида бир ҳарбий снаряд парчаси тегиб, ўртача жароҳат олган ва касалхонага ётқизилган.
Донбассдаги Украина Бирлашган кучлари штаби, жумладан, Луганск вилоятида Ўт очишни тўхтатиш масалаларини назорат қилиш ва мувофиқлаштириш қўшма марказининг Украина вакилларига тегишли юк машинаси йўқ қилинганини билдирган. Штабдагиларга кўра, бўлгинчилар миномёт, гранатомёт ва йирик калибрли пулемётлардан ўққа тутишган.
Бўлгинчилар эса, ўз навбатида, сукунат режими бузилишида ва ўт очишларда украин ҳарбийларини айблашмоқда. Хусусан, тан олинмаган “Луганск халқ республикаси” сутка давомида Украина томони “ЛХР” ҳудудини 50 марта ўққа тутгани, 24 та аҳоли пункти нишонга олинганини иддао қилмоқда.
Россияпараст “Донецк халқ республикаси” бўлгинчилари эса якшанба куни украин ҳарбийлари уларни 37 марта ўққа тутишгани, “тинч аҳолини ҳимоя қилиш мақсадида. Минск битимлари билан ман этилган қуроллардан” жавоб зарбасини берганларини иддао қилганлар.
Россия Тергов қўмитаси Донбассдаги отишмалар юзасидан иккита жиноят иши очганини маълум қилган. Улардан бири “ЛХР” ҳудудидаги Пионерское қишлоғи ўққа тутилиб, икки киши ҳалок бўлгани, иккинчиси эса Ростов вилояти ҳудудига Украина томонидан снаряд учиб келганига доир иддаолар билан боғлиқ.
Сўнгги кунларда ЕХҲТнинг Махсус мониторинг миссияси Донбассда ўт очишлар интенсивлиги кескин ортганини қайд этмоқда. Бу воқеалар Россиянинг Украина чегаралари яқинида катта куч тўплагани ва Ғарб мамлакатлари Россиянинг бирор провокация баҳонасида яқин кунларда Украинага ҳужум қилишидан хавфсираётгани манзарасида рўй беряпти.
Пекинда қишки Олимпия ўйинларининг ёпилиш маросими бўлиб ўтди
ХХР пойтахти Пекинда 20 февраль куни қишки Олимпиаданинг ёпилиш маросими ўтказилди. Мусобақаларда спортнинг етти турининг 15 йўналиши бўйича 109 комплект медаль ғолибларга топширилди.
Олтин медаллар сони бўйича бу галги ўйинларда биринчи ўринни Норвегия, иккинчи ўринни Германия, учинчи ўринни эса Хитой эгаллади. Айни пайтда қозонилган медаллар сони бўйича АҚШ тўртинчи ўринга, Россия эса тўққизинчи ўринга эга бўлди.
Пекиндаги қишки Олимпиада 4 февраль куни очилган бўлиб, коронавирус пандемияси туфайли жиддий чекловлар шароитида ўтказилди – мусобақа келган спортчилар маҳаллий аҳоли билан алоқада бўлганлари йўқ.
Аввалроқ АҚШ Хитой пойтахтида ўтказилиши кутилган Олимпия ўйинларига нисбатан “дипломатик бойкот” эълон қилган. Бунга Хитой расмийлари томонидан Шинжондаги уйғур ва бошқа мусулмон миллатлар вакилларининг таъқиб қилаётгани, камида 1 миллион мусулмонни қамоқда сақлаётгани сабаб ўлароқ кўрсатилган. Вашингтоннинг бу ташаббуси кейинроқ Канада, Австралия, Британия каби давлатлар томонидан дастаклаб чиқилган. Бойкотнинг спортчиларга дахли бўлмаган ва фақат мазкур мамлакатлардан бўлган расмийларнинг Олимпиадага боришдан воз кечганини англатган.
Пекиндаги Олимпиаданинг очилиш маросимида Ўзбекистон президенти Ш. Мирзиёев ҳам қатнашган. Ўйинларда Ўзбекистондан фақат бир спортчи - тоғ чанғичиси Комилжон Тўхтаев иштирок этган, бироқ у совринли ўринларга етиб боролган эмас.
Галдаги қишки Олимпия ўйинлари 2026 йилнинг февраль ойида Италияда бўлиб ўтиши кутилмоқда.
Қирғизистонлик ва тожикистонликлар чегарада “Сулҳ оши”га йиғилишди
Қирғизистон ва Тожикистоннинг чегараолди қишлоқлари аҳолиси 19 февраль куни “Сулҳ оши”га жам бўлди.
Озодликнинг тожик хизмати хабарига кўра, мазкур учрашув Тожикистоннинг Хистеварз жамоати билан Қирғизистоннинг Борбордук қишлоғи кесишган жойдаги “Раъно” ресторанида бўлиб ўтган.
Тадбирда икки мамлакат чегараолди қишлоқларидан 100 га яқин киши, шунингдек, Тожикистоннинг Бобожон Ғафуров тумани раҳбари Зафарбек Давлатзода билан Қирғизистоннинг Боткен тумани ҳокими Алмазбек Рахманкулов ҳамда ҳар иккала томондан ҳарбийлар иштирок этган.
Мазкур тадбир қирғиз-тожик чегарасида 27 январь куни содир бўлган қуролли тўқнашув ортидан ўтказилган дўстлик учрашувларининг учинчиси бўлган.
Ўтган ой рўй берган мазкур тўқнашув чоғида икки мамлакат вакиллари можаро юзага келишида бир-бирларини айблаб чиқишган. Тўқнашув пайтида Қирғизистон томонидан 13 киши жабрланган, Тожикистон томонидан эса икки киши нобуд бўлиб, 10 киши жароҳат олган. 28 январга ўтар кечаси бўлиб ўтган музокаралар натижасида икки томон чегарада ўт очишни бутунлай тўхтатишга келишиб олганлар.
Шарқий Украинадаги фронт чизиғида фаолият юритаётган халқаро журналистлар хавфсиз жойга кўчирилди
Украина Россия қўллаб-қувватлаётган айирмачилар томонидан ўққа тутилиши мумкинлиги тўғрисидаги огоҳлантиришлардан сўнг Шарқий Украинадаги фронт чизиғида бўлиб турган халқаро оммавий ахборот воситалари вакиллари 19 февраль куни зудлик билан хавфсиз жойга кўчирилди. Бу ҳақда Reuters агентлиги хабар берди.
Журналистлар Донетскдаги Зайтсеве қишлоғи яқинидаги бункерда эканлигида ўқ овозлари эшитилди.
Украина ҳарбийлари ўзининг Facebook'даги саҳифасида кун бошидан буён айирмачилар ўт очишни тўхтатиш келишувини 70 марта бузганини, кеча эса 66 та шундай ҳолат қайд этилганини маълум қилди.
Айирмачилар оғир артиллериядан фойдаланиб, фронт чизиғи бўйлаб 30 дан ортиқ аҳоли пунктларига ўт очган. Аммо, бу келишувларга зид, дейди ҳарбийлар.
Ҳафта давомида ҳукумат кучлари ва айирмачиларни ажратиб турувчи чизиқ бўйлаб ўқ отиш ҳолатлари кескин ортди. Украина ҳукумати буни провокация деб атади. У Россиянинг Киев Украина шарқида ҳужум бошлаши мумкинлиги ҳақидаги айбловларини кескин рад этди.
Шанба куни Украина шарқида россияпараст айирмачилар ўт очиши оқибатида икки аскар ҳалок бўлгани ва тўрт нафари яралангани маълум қилинди.
КХШТ Донбассга тинчликпарвар кучлар юбориши мумкинлигини билдирди
КХШТ, зарурат туғилган тақдирда, Донбассга тинчликпарвар кучлар юбориши мумкинлиги тўғрисида 17 февраль куни ташкилот бош котиби Станислав Зас Рейтер агентлигига берган интервьюсида маълум қилди. У буни Москванинг НАТОга жавоби дея изоҳлаган.
Аввалроқ Украина шарқидаги Донбасс минтақасида ўзиларини мустақил республика сифатида эълон қилган Донецк ва Луганск сепаратчилари Украина ҳарбийлари билан отишмалар бошланганини, аҳоли Россия ҳудудига эвакуация қилинаётганини билдирган эди.
Ўтган ой ўзининг 20 йиллик тарихида биринчи марта Қозоғистондаги намойишларни бостириш учун Қозоғистонга қўшин киритган ташкилот раҳбари Зас Украинадаги инқирозни ҳал қилишнинг ягона йўли музокаралар эканлигини таъкидлади.
КХШТ ўзининг олти аъзоси - Россия, Беларус, Арманистон, Қозоғистон, Қирғизистон ва Тожикистон қуролли кучларига таянади. Умумий фаол ҳарбий кучлари 900 000 кишидан иборат Россия ҳозиргача КХШТнинг энг қудратли аъзоси ҳисобланади ва ташкилотнинг бирлашган ҳарбий штаб-квартирасини бошқарувчиси россияликдир.
Заснинг айтишича, КХШТ доимий шай ҳолатда бўлган 17 минг кишилик қўшин ва 4 мингга яқин аскардан иборат махсус тинчликпарвар кучларга эга.
Россиянинг 30 минг аскари Беларусда номаълум муддатга қоладиган бўлди
Москва ва Минск Украинанинг россияпараст исёнчилар назоратидаги Донецк вилоятида вазият кескинлашгани оқибатида “Иттифоқ қатъияти – 2022” қўшма ҳарбий машғулотлари муддатини узайтиришга қарор қилди. Бу ҳақда 20 февраль куни Беларусь мудофаа вазири Виктор Хренин билдирди. Аммо у узайтирилган муддат қачон якунланиши тўғрисида маълумот бермади.
Беларуснинг Украина билан чегарадош ҳудудларида ўтказилаётган “Иттифоқ қатъияти – 2022” машғулоти 10 февралда бошланган ва 20 февралда якунланиши лозим эди.
Беларусга ҳарбий машғулот баҳонасида Россиянинг 30 минг аскари, С-400 зенит-ракета мажмуалари дивизионлари, “Панцирь-С” зенит ракета-тўп дивизиони, шунингдек, Су-35С ва Су-25СМ қирувчи ва ҳужумчи учоқлари киритилган.
Беларусь президенти Александр Лукашенко 18 февраль куни Москвада Путин билан учрашишини ва учрашувда Беларусга киритилган Россия қўшинлари тақдири ҳал этилишини айтган эди.
“Эртага қандай қарорга келсак, шундай бўлади. Қарор қилсак -бир сутка ичида олиб чиқиб кетилади. Қарор қилсак - бир ой шу ерда қолишади. Қуролли Кучлар қанча керак бўлса, шунча муддат шу ерда қолади”, -деб айтганди Лукашенко.